خطوات تجديد رخصة السيارة إلكترونياً
- اتأكد ان شروط التجديد الإلكتروني متوفرة فى سيارتك.
- اعمل حساب على موقع myFawry.
- ادخل على خدمة تجديد رخصة السيارة.
- ادفع الرسوم و الضريبة.
- ادفع المخالفات، أو ممكن تعمل تظلم من على موقع نيابة المرور.
- ادفع رسوم التوصيل للمنزل حوالى 20 جنيه.
- خلال 7 أيام عمل الرخصة بتجيلك لحد البيت.
لو مش عايز تستخدم خدمة فوري، ممكن تجدد من على موقع المرور. مشكلة موقع المرور إنه مش دايماً متاح ساعات كتير بيكون مش عايز يفتح. كمان لو جددت عن طريقه هتضطر تروح المرور برضه عشان تستلم الرخصة. فاحنا هنشرح طريقة التجديد بإستخدام خدمة فورى أون لاين من البيت عشان هما كمان بيوصلولك الرخصة لحد عندك. الطريقة ديه هتاخد منك حوالي 20 دقيقة و الرخصة هتوصلك خلال 7 أيام عمل.
ملحوظة: طبعاً هتحتاج بطاقة إئتمانية أو أى كارت بنكي عشان تدفع بيه أونلاين.
شروط التجديد الإلكتروني
- لازم العربية تبقى ملاكي.
- لازم العربية مايكونش معاد الفحص بتاعها.
- لازم سعة الموتور تكون مش أكتر من 2030 سي سي.
- لازم الرخصة تكون بإسمك أو معاك توكيل مفتوح من المالك.
1- إنشاء حساب على موقع myFawry
روح على موقع myfawry.com و دوس على سجل الآن.
املا بيانات الاسم، رقم التليفون، البريد الالكتروني، تاريخ الميلاد، النوع، و كلمة السر. اتأكد انك دخلت البريد الالكتروني و رقم التليفون صح عشان هيجيلك عليهم رسائل مهمة بعدين. و دوس على التالي.
دلوقتي هيجيلك رسالة SMS على الموبايل فيها كود التفعيل. هتدخله في خانة رمز التفعيل و تدوس تأكيد.
فى الصفحة اللى بعدها هتدخل بيانات البطاقة الإئتمانية بتاعتك. تقدر تسميها أى إسم، زي مثلاً “كارت البنك الأهلي”، و هتدخل رقم الكارت، تاريخ انتهاء الصلاحية، و رقم الCVV اللى هو ال3 أرقام الموجودين على ضهر الكارت. و دوس على التالي.
في النهاية، عشان فورى يتحقق من ملكيتك للكارت، هيجيلك رسالة SMS من البنك اللى انت تابع ليه مكتوب فيها إن تم خصم مبلغ من الكارت بتاعك. المبلغ ده بيكون ما بين جنيه و 5 جنيه. هنفترض مثلاً إن المبلغ كان 2 جنيه و 37 قرش. هتدخل المبلغ ده بالظبط فى الصفحة اللى قدامك على موقع فوري و تدوس تأكيد.
مبروك كده حسابك شغال و تقدر تروح تجدد الرخصة. و المبلغ المسحوب من حسابك اللى هو 2.37 جنيه ده هيتردلك تاني على حسابك.
2- دفع رسوم تجديد الرخصة
من لوحة تحكم فوري هتدوس على عملية جديدة.
و هتختار “مرور جميع المحافظات”.
هتلاقي 3 حاجات المفروض تدفعهم، ادفعهم بالترتيب احسن:
- الرسوم و الضريبة.
- المخالفات.
- رسوم التوصيل للمنزل.
أولاً الرسوم و الضريبة. هاتدخل البيانات المطلوبة: الرقم القومي، أرقام اللوحة، عايز تجدد كام سنة، رقم موبايلك. و بعدين تدوس على التالي، و تختار الكارت اللى هتدفع بيه اللى هو انت لسه مدخله من شوية، و بعدين تتم عملية الدفع.
تاني حاجة المخالفات. هاتدخل برضه الرقم القومي و أرقام اللوحة، هيظهرلك عدد المخالفات و الإجمالي، دوس على التالي و اختار كارت الدفع و ادفع.
ملحوظة: لو فيه مخالفات انت معملتهاش، ممكن متكملش الخطوات و تروح الأول على موقع خدمات نيابة المرور تعمل تظلم على المخالفات و تستنى الرد خلال 48 ساعة.
و اخيراً خطوة إستلام الرخصة من المنزل. هاتدخل الرقم القومي و أرقام اللوحة و رقم موبايلك و تدفع الرسوم حوالى 20 جنيه.
كده انت دفعت كل حاجة و خلصت الخطوات كلها. خلال 7 أيام عمل هيكلمك مندوب من الشركة يشوف لو حضرتك متواجد فى البيت عشان يجيلك يديلك الرخصة. و طبعاً حضرتك لازم تمضي بالإستلام و لازم تسلمه الرخصة القديمة.